istri : Bang, Abang kaga denger tadi po Romle berantem ane lakinye , .......

suami : Denger sih, ilok gue kaga denger, orang rume kontrakan kite cuma sebelahan gini....tapi gue kaga nguping, nah elu jadi usil aje ke nguping...

istri  :  bukan aye usil trus aye nguping, aye takut ade KDRT...

suami : Nah trus dari hasil pengupingan elu tadi kesimpulannye ape...?

istri : ntu bang po Romle minta uang belanje ame bang Mansur...lakinye... Kaga dikasih lantaran kaga punye duit.... Kate po Romle die kaga mo masak kalo kaga dibagi duit belanje, ude malu utangnya ude banyak di ayu sayur....

suami : Ehm, begitu.... Kalo gitu ni hari lu masak yg rade banyakan.... Mumpung masih pagi gue kepasar sekarang...

istri : hah...Abang mo kepasar? Mo ngapain bang....

suami : Kepasar lu bilang mo ngapain, ya belanje Fatmeeeeee.... Masa mo pelesir....
Ude lu diem aje... Setengah jem Abang ude balik...

(Kaga lame bang bang  Husin ude balik dari pasar)

istri : ini ikan Cue Bandeng banyak amat bang, Ampe lime ekor Abang beli....

suami : Berisik lu.... Gini sekarang ni ikan Cue Bandeng lu masak...semue...

istri : semue bang....?

suami : Iye.... Lu ikutin aje ape Kate Abang... Ye Fatmeeeeee... Bini Abang yg Denok... Yg Botoh.... Sekalian lu masak Juge noh Toge, ame kucai.... Tumis deh campurin irisan tahu... Masak nasi Juge begitu,  banyakan ... Due leter lu masak...
Jangan banyak tanye masak aje...

istri  :ye Abaaaaang....

suami : Cakeeepppp.... Nah Abang mo kerume pak Joko dulu mo nanyain jadi ga tanahnye dijual Abang Ade pembeli, Ngkali aje rejeki kite...

Assalamu'alaikum...

(Due jam kemudian....)

istri : Bang ude Mateng .... Trus gimane nih.. masakan banyak banget....

suami : Nah sekarang lu ke si Romlah gih.. bilang begini.... Po' aye lagi belajar masak Cue Bandeng di Cabein... Pura-puranya lu minta die nyobain ude enak ape belon ....nah sekalian deh lu bagi die.. terserah lu bahasenye gimane... Yg penting kaga keliatan kalo kite mo ngasih die...

istri : Ooohhh aye paham maksud Abang... Pokoknye gimane carenye kite bise ngasih po Romle masakan tapi die kaga merase ...supaye kaga Ade perasaan kesinggung gitu..bang...

suami : Cakeeepppp... Begitu maksud Abang... Duh makin botoh aje bini Abang...

istri : jangan muji maren aye dibilang pesek ...

suami : Bukan pesek, cuman kurang kedepan ujungnya tuh idung...

istri : Same aje....

suami : Udeeee.... Buruan Nti keburu siang...

istri : ye bang....

( Setenge jam kemudian Fatme ude balik dari rume sebele ...nemuin po Romlah)

suami : Gimane ude....???

istri : ude bang...

suami : Trus.... ???

istri : pok Romle bilang masakan aye enak Kate die...

suami : Emang masakanlu enak.... Apaan aje yg lu kasih ...

istri : ikan Cue due ekor, sayur semangkok, ame nasi ...cukup deh buat die makan betige ane lakinye Juge anaknye....

suami : Alhamdulillah....ya Allah.... Makasih ye Fatmeeeeee, bini Abang yg botoh... Lu ude nyelametin kite ...

istri : ah ko aye ude nyelametin kite ape maksudnye Bang.?

suami : Maksudnye..?
Abang pernah dikasih tau sebuah hadis ame ustadz kite ...Sabda Nabi Muhammad SAW..."Bukanlah kaumku, bagi orang-orang yg perutnya kenyang sementara tetangganya lapar..."
Bise lu bayangin kalo kite kaga tau Ade tetangge sebele perutnya lapar, lantaran kaga punye uang buat belanje, trus kite enak-enakan makan ...Ampe kite kenyang... Celake ape kaga ... Sebab kite ude divonis bukan lagi umatnye nabi kite.... Nabi sendiri yg fonis.. ngeri gue...

istri  : iye,ye bang..... Aye bersyukur punye laki Kaye Abang... Yg paham banget urusan agame... Maapin Fatme ye bang kalo aye banyak salenye...

suami :  Iye Fatme , Abang Juge begitu